இந்தியாவில் இந்த ஆண்டின் பண்டிகை கால ஆன்லைன் விற்பனை எதிர்பார்த்ததை விட மிகச் சிறப்பான முறையில் தொடங்கியுள்ளது. நாட்டின் முன்னணி ஈ-காமர்ஸ் நிறுவனமான பிளிப்கார்ட், தனது புகழ்பெற்ற ‘பிக் பில்லியன் டேஸ்’ விற்பனையின் முதல் நாளிலேயே தினசரி செயலில் உள்ள பயனீட்டாளர்கள் எண்ணிக்கையில் புதிய சாதனையைப் படைத்துள்ளது. சர்வதேச BofA வெளியிட்டுள்ள ஆய்வறிக்கையின்படி, (Sensor Tower )சென்சார் டவர் தரவுகளை அடிப்படையாகக் கொண்டு இந்த வளர்ச்சி உறுதி செய்யப்பட்டுள்ளது. இந்திய நுகர்வோரின் வாங்கும் திறன் அதிகரித்து வருவதையும், ஆன்லைன் ஷாப்பிங் மீதான நம்பிக்கை மேலும் வலுப்பட்டுள்ளதையும் இது தெளிவாகக் காட்டுகிறது.
சிறு நகரங்களில் அதிகரிக்கும் ஆன்லைன் ஷாப்பிங்
இம்முறை ஆன்லைன் விற்பனையின் மிகப்பெரிய சிறப்பம்சமாக மெட்ரோ அல்லாத நகரங்களின் பங்களிப்பு அமைந்துள்ளது. பிளிப்கார்ட் தளத்தில் பதிவான ஒட்டுமொத்தப் பொருட்களுக்கான தேவையில் சுமார் அறுபது சதவீதத்திற்கும் அதிகமான ஆர்டர்கள் இரண்டாம் மற்றும் மூன்றாம் கட்ட நகரங்களில் இருந்தே வந்துள்ளன. சிறு நகரங்களில் இணைய வசதி மற்றும் ஸ்மார்ட்போன் பயன்பாடு அதிகரித்ததன் காரணமாக, பிளிப்கார்ட் தளத்திற்கு வரும் புதிய வாடிக்கையாளர்களின் எண்ணிக்கை முந்தைய ஆண்டை விட முப்பத்து நான்கு சதவீதம் உயர்ந்துள்ளது. பிளிப்கார்ட் மட்டுமின்றி அமேசான் மற்றும் மீஷோ ஆகிய பிற முன்னணி நிறுவனங்களும் பண்டிகை காலத்தின் தொடக்க நாட்களிலேயே மிக வலுவான வர்த்தகத்தைப் பதிவு செய்து அசத்தியுள்ளன.
பேஷன் மற்றும் அழகு சாதனப் பொருட்களுக்கு நிலவும் அதிக தேவை
ஆடை மற்றும் பேஷன் துறையில் பிளிப்கார்ட்டின் துணை நிறுவனமான மைந்த்ரா தனது ஆதிக்கத்தைத் தொடர்ந்து தக்கவைத்து வருகிறது. செப்டம்பர் மாத நிலவரப்படி இதன் மாதாந்திர பயனீட்டாளர்கள் எண்ணிக்கை ஒன்பது கோடியை தாண்டியுள்ளது. பண்டிகை கால விற்பனை தொடங்கிய முதல் சில நாட்களிலேயே இதன் தினசரி பயனர்களின் வருகை நாற்பது சதவீதம் வரை அதிகரித்துள்ளது. அதேபோல் அழகு சாதனப் பொருட்கள் பிரிவில் நைக்கா நிறுவனம் நுகர்வோரின் முதன்மைத் தேர்வாக விளங்குகிறது. நைக்கா பேஷன் தளத்தைப் பயன்படுத்தும் மாதாந்திர வாடிக்கையாளர்களின் எண்ணிக்கை இருபத்து நான்கு சதவீதம் வரை உயர்ந்து, ஆன்லைன் பேஷன் சந்தையில் புதிய மைல்கல்லை எட்டியுள்ளது.
வாடிக்கையாளர்களை ஈர்க்கும் சிறப்புச் சலுகைகள்
வாடிக்கையாளர்கள் அதிக மதிப்பிலான மின்னணு சாதனங்கள் மற்றும் வீட்டு உபயோகப் பொருட்களை எளிதாக வாங்குவதற்குப் பல்வேறு வங்கிகள் வழங்கும் சிறப்புச் சலுகைகளும், சுலப தவணை முறைகளும் மிகப்பெரிய உறுதுணையாக இருந்துள்ளன. நோ-காஸ்ட் இ.எம்.ஐ மற்றும் உடனடி தள்ளுபடி சலுகைகள் நுகர்வோரை அதிக அளவில் ஈர்த்துள்ளன. அதேசமயம், விரைவு டெலிவரி வழங்கும் ‘க்விக் காமர்ஸ்’ தளங்களான பிளிங்கிட் மற்றும் செப்டோ போன்றவற்றின் மாதாந்திர பயனர்கள் எண்ணிக்கை கணிசமாக உயர்ந்திருந்தாலும், பண்டிகை கால தொடக்கத்தில் பெரிய அளவிலான தள்ளுபடி விற்பனை தளங்களையே மக்கள் அதிகம் பயன்படுத்தியுள்ளனர் என்பது இந்த அறிக்கையின் மூலம் தெரியவந்துள்ளது.
