இந்திய டிஜிட்டல் பணப் பரிவர்த்தனை சந்தையில் கூகுள் பே (Google Pay), ஃபோன்பே (PhonePe), பேடிஎம் (Paytm) போன்ற நிறுவனங்கள் ஆதிக்கம் செலுத்தி வரும் நிலையில், அவற்றிற்குப் போட்டியாக உள்நாட்டு நிறுவனமான ஜோஹோ (Zoho), ‘Zoho Pay’ என்ற புதிய யுபிஐ (UPI) செயலியை அறிமுகப்படுத்தத் தயாராகி வருகிறது. தற்போது இந்த செயலி சோதனை செய்யப்பட்டு வருவதாகவும், விரைவில் பொதுமக்கள் பயன்பாட்டிற்குக் கொண்டு வரப்படும் என்றும் எதிர்பார்க்கப்படுகிறது.
‘Zoho Pay’-இன் முக்கிய அம்சங்கள்
- தனிச் செயலி மற்றும் ஒருங்கிணைப்பு: Zoho Pay ஒரு தனி மொபைல் செயலியாக (Standalone App) அறிமுகப்படுத்தப்படும். அதே சமயம், ஜோஹோவின் உள்நாட்டு மெசேஜிங் செயலியான ‘அரட்டை’ (Arattai) உடன் இது ஒருங்கிணைக்கப்படும். இதன் மூலம் அரட்டை பயனர்கள், சாட் செய்துகொண்டே பணம் அனுப்பவும், பெறவும் முடியும். இது வாட்ஸ்அப் பே-க்கு நேரடி சவாலாக இருக்கும்.
- பரிவர்த்தனைத் தீர்வு: இது ஒரு தனிநபர்-க்கு-தனிநபர் (Peer-to-Peer – P2P) மற்றும் வணிகப் பரிவர்த்தனைகளுக்கான (Merchant Payments) விரிவான தீர்வாக இருக்கும். இதன் மூலம் பணம் அனுப்புதல், பெறுதல், பில்களை செலுத்துதல் போன்ற அனைத்து யுபிஐ செயல்பாடுகளையும் மேற்கொள்ளலாம்.
- வணிகங்களுக்கான ஒருங்கிணைப்பு: ஜோஹோ ஏற்கெனவே ரிசர்வ் வங்கியால் அங்கீகரிக்கப்பட்ட கட்டண ஒருங்கிணைப்பாளர் (Payment Aggregator) செயல்படுகிறது. மேலும், பிசினஸ்-க்குத் தேவையான மென்பொருட்களை வழங்குவதிலும் ஜோஹோ முன்னணியில் உள்ளது. இந்த புதிய UPI செயலியானது, ஜோஹோவின் மற்ற வணிகச் செயலிகளுடன் எளிதாக ஒருங்கிணைக்கப்படும். அண்மையில் அறிமுகப்படுத்தப்பட்ட POS (Point-of-Sale) சாதனங்கள் மற்றும் சவுண்ட்பாக்ஸ்களுடன் இது இணக்கமாக செயல்படும்.
- உள்நாட்டு தொழில்நுட்பத்தின் வலிமை: ‘மேட்-இன்-இந்தியா’ (Made-in-India) என்ற முழக்கத்துடன் ஜோஹோ களமிறங்குவது, இந்திய டிஜிட்டல் கட்டணச் சந்தையில் ஒரு புதிய போட்டி அலையை ஏற்படுத்தும் என்று எதிர்பார்க்கப்படுகிறது.
இந்தியாவில் டிஜிட்டல் பரிவர்த்தனைகள் அதிகரித்து வரும் நிலையில், ஜோஹோவின் இந்த புதிய நகர்வு, ஏற்கெனவே சந்தையில் ஆழமாக கால் பதித்துள்ள வெளிநாட்டு நிறுவனங்களுக்கு ஒரு கடுமையான சவாலை ஏற்படுத்தியுள்ளது.